楊崢同男友黃宗澤（Bosco）戀情曝光後，負面新聞可謂日日精彩日日甘，今日有報道指有人向Bosco告發佢劈腿，為此兩口子近日吵大鑊，令戀情告急，瀕臨分手邊緣。楊崢似乎早已有心理準備，今日如常返到商台主持節目，一開咪時就被拍檔問到相關報道，楊崢氣定神閒話：「我都唔知講咩，基本上都係一樣，無啲咁嘅事，唔真實嘅嘢，唔再回應﹑唔再講咁多。」

而楊崢做完節目後，今午十二點幾離開商台，問到佢同Bosco吵大鑊報道，佢早有準備咁邊行邊答記者，全程仲笑笑口添，佢話:「冇咁嘅事，今日都回應咗!」雙方係咪關係好好？佢又話:「總之唔係事實嘅嘢唔回應。」但就冇答關係好定唔好﹗

咁多新聞有冇壓力先？楊崢就話:「一切如常!」問佢係咪太高調？楊崢就好「低調」咁聽唔到，然後「一切如常」咁揸住Bosco擁有嘅仿古車離開喇。