冼國林、梁小龍、石修、葉尚華、丁羽等今日冒著8號風球，喺佐敦出席一間酒莊嘅開幕，冼國林表示係嚟支持酒莊老闆，問佢平時有冇品酒？佢話：「以前冇，識咗呢個老闆就有，啲人成日話我淨係識做嘢，唔識享受。」講到王祖藍同邵氏合作組經理人公司「手工藝」，可惜開業僅一年，傳出旗下藝人「分手離場」，冼國林話：「佢係我外姪，我都有留意，其實祖藍本身個人好有心去做，但佢自己好忙，我自己都係做經理人，一忙就對藝人未必照顧得到，但係個個都係老友支持，好似小恩子（黎瑞恩）就算唔簽，都係好朋友。」過兩招俾祖藍？冼國林表示：「其實我都唔叻，我簽藝人都係簽幾個，早排開咗《我們的6E班》，票房雖然收百幾萬，但係好多包場，0依家包場都超過100場，我諗冇一部電影落咗畫都有包場至年底。」佢指經理人同藝人要互相付出，祖藍就係缺乏時間。

梁小龍透露剛由瀋陽返港，佢話：「拍趙本山監製嘅作品《奉天大飯店》，仲有狄龍、洪金寶，每個演員都有自己嘅故事，有笑有打。」梁小龍表示近排打到飛起，之前拍咗一部《功夫大聯盟》，分別同陳國坤、趙文卓、樊少皇對打。工作係咪排得好密？佢話：「呢個年紀而又識得功夫，唔多個5個，見親都係元華、洪金寶、徐少強、樊少皇。」小龍哥咪成日收人仔（人民幣）？佢即刻話：「喺香港唔好講呢啲，我係義務。」