當年今日
關於我們

賣走碧咸星味大減
球驗客手記:紅魔搵新兵冇生招牌

蘋果日報 2003/06/24 00:00


曼聯賣走碧咸後,繼續用其他方法搵錢,最快捷當然係出新波衫,將件第二作客波衫由藍色變成黑色,同皇家馬德里件作客衫一樣玩「黑色誘惑」!
無咗碧咸,曼聯今次就派隊長堅尼等三人一齊着呢件衫做宣傳。其實,紅魔鬼件藍色戰衣一年前先至推出,我求大俠都估唔到咁快又出新款;之不過,呢件黑色波衫同藍色嗰件差唔多,係個領位轉咗少少款,就變咗新波衫嘞,都幾掠水!
講開曼聯,老費最近搵嘅新兵包括謝利美同迪查巴同來自喀麥隆,美洲就有朗拿甸奴同簽咗嘅美國門將侯活;用碧咸換呢批球員,平均實力應該增強咗,但係我求大俠發覺無個可以做生招牌,嚴格嚟講得舊將雲尼斯達羅夠靚仔頂碧咸,幫手宣傳曼聯呢個品牌。如果老費想場外場內都兼顧,真係要諗諗計!

曲波投熱刺似成事
有傳熱刺最後攞唔到歐洲足協盃參賽資格,令到曲波轉會胎死腹中;但佢嘅經理人高琪講已收到熱刺嘅傳真,叫曲波保持好狀態,隨時赴英做體測。高琪重話熱刺早喺四月畀咗十萬鎊首期,所以今次唔會有問題,我求大俠惟有就祝曲波轉會順利啦!

杜斯亞加入卡塔爾掘金團
早輪咪講過好多過氣球星都去卡塔爾搵食,估唔到連教練都一樣。卡塔爾足總宣布跟前日本國家隊教頭杜斯亞喺星期一簽約,下月一日起教卡塔爾國家隊至○五年九月。杜斯亞喺○二世盃就帶日本殺入十六強,唔知帶卡塔爾又會有乜成績?
羅馬里奧返巴西一樣掂
講開去卡塔爾搵食,去過嗰邊效力嘅羅馬里奧回歸巴西聯賽一樣咁威,喺星期日嘅巴西足球聯賽大演帽子戲法助富明尼斯以五比二擊敗古蘭尼。雖然我求驗客都好戥三十七歲嘅羅馬里奧高興,不過古蘭尼有三件被逐,究竟佢係咪真係寶刀未老,就真係要睇多幾場先知。

薛玉洋有「商機」搶手
姚明加盟火箭後,令唔少NBA球隊見識到佢商機無限嘅吸引力;加上今年嘅選秀會已經有二十七人退出,所以嚟緊有份參加選秀嘅中國同胞薛玉洋,雖然球技仲爭啲,但已經有唔少出名多華人聚居嘅球隊,例如金州勇士同洛杉磯快艇都話會考慮簽佢,至於點解,就唔使問我求大俠都知喇!

施蒙尼教波生涯多波折
大家重記唔記得前國際米蘭教練施蒙尼呢?佢都算命苦,喺九八年十一月當選意大利最年最佳教練嗰日,被國米炒魷;之後喺○○/○一球季帶咗拖連奴八場又被炒。今屆帶領乙組安科納歷來第二次升上意甲,點知又因為同會長比亞朗尼唔妥,喺星期日被請食無情雞!