愛華頓今夏雖然送走咗盧卡古，但簽入朗尼、比克福特、卡拉臣、辛度拉美利斯及米高堅尼等球員，來季已有挑戰Big 6嘅一定本錢，但據講領隊朗奴高文仍對陣容未滿意，雖然已用咗近9,000萬鎊，仍準備掟多3,000萬鎊出嚟，斟介阿仙奴翼鋒禾確特。

其實，高文原本想斟嘅係禾仔隊友基奧特，但後者似乎無意離開兵工廠，所以朗奴高文改為向禾仔落手，尤其佢考慮到陣中翼鋒恩歷克波拿斯季初會繼續倦勤，最快都要去到聖誕先可以傷癒回歸，所以擔心邊線冇良將可用。

愛華頓已喺盧卡古身上賺咗7,500萬鎊，亦準備將巴克里賣去熱刺，所以高文絕對有充足彈藥去繼續擴軍。另外，熱刺周日宣佈，已經將上季借去馬賽嘅23歲喀麥隆前鋒尼積爾，正式賣咗畀呢間法甲球會。