上個月底先加入新民黨嘅前保安局局長、全國政協委員黎楝國，今日首次以「常務副主席」身份現身記招，會後被問到入黨原因，佢話主要因為同新民黨理念相近，覺得可以繼續為巿民服務，又話覺得自己同葉劉好有默契。既然係入政黨，自然會被問到，未來會唔會參選？66歲嘅黎棟國聽完就耍手擰頭：「新民黨大把人啦，咁多後生嘅！」

今日喺記招大談土地政策嘅黎棟國坦言，擔任局長期間「根本無涉獵（土地政策）啦，唔係少，係無啊！」，所以自己事先都要做啲功課，大讚新民黨嘅資料搜集都好豐富。對於葉劉記招期間突然喺佢側邊撕爛土地供應專責小組徵求意見嘅「點心單」式問卷，黎棟國話唔覺得「過激」：「唔係（好激）吖，佢（撕得）好慢啫！佢好慢啫！」

咁做咗副主席，又身兼政協會否好忙？黎棟國就話一定無做局長嗰陣咁忙，「最低限度，打風嗰日我有覺瞓先啦！係咪先？」講起政府處理颱風山竹襲港問題，黎棟國話政府喺準備同中段工作做得非常好，「但臨門最後嗰一腳，喺交通方面，的確有好多問題出咗出嚟」，希望政府今次「經一事，就多啲理解啦」，下次若再遇到類同情況，要處理得更好，例如發放資訊時可以更清晰，畀巿民充份知道香港當時已無哂陸路交通，即使湧去地鐵站都係搭唔到車。

咁政府應唔應該帶頭宣佈停工？黎棟國就話呢個要求係「對錯焦」，話大家都睇到今次風災最大影響係新界東，其他地方基本上可以返到工，所以係局部性問題，全港性停工根本解決唔到個問題，又話政府喺風災後好多工作要做，如果嗌停工，「咁咪即係將問題拖後啲？」

立會補選新聞，《蘋果》一網睇晒：
http://bit.ly/appledaily1125