上個月21歲嘅陳銘泰喺香港城市田徑錦標賽,造出8.11米成績贏金牌,但大家唔使大驚小怪,佢喺五月造出8.12米,呢個新香港紀錄,喺12年倫敦奧運,夠攞銅牌!
下個月巴西里約熱內盧奧運,香港跳遠王子將會以外卡身份出戰。佢話:「第一次去奧運,今次嘅目標,就係希望可以感受奧運的壓力,希望可以頂得住壓力之餘,可以跳到自己海外賽事嘅個人最佳成績,即係八米。」
去到王子呢個level,背後有辛酸,陳銘泰中一、二嗰陣好細粒,喺班入面可能排第六或第七個,到中四先開始發育,家吓有1.75米。身形固然重要,但佢咁成功,背後有一位私人教練,就係陳慧賢。陳教練話:「陳銘泰細細個好有鬥心,就算自己唔勁都會搏!」兩個人至今合作咗11年,陳慧賢話自己好似半個媽咪咁,管埋陳銘泰讀書同作息時間。
雖然陳教練去唔到巴西撐場,但會睇電視直播留意愛徒跳成點,仲話會sendmessage提點,兩師徒仲話希望汲取里奧經驗,四年後東京奧運再搏過!