亞視熄機，《蘋果動新聞》今晚邀請一眾亞視代表人物，包括林建明(沙姐)、歐錦棠、羅霖、劉錫賢、蔡國威和袁潔儀現身直播節目《真熄亞視Live》，臨別依依，潔儀最唔捨得﹕「我以為自己平復，但嗰刻來臨又係眼濕濕，好似親人走咗，以為自己會接受，但今日原來自己又唔接受，希望呢刻完咗後慢慢再平復。」

佢哋仲分享咗在亞視多年最難忘事，沙姐講笑話﹕「我最難忙呢幾日，因為不停咁為亞視幫報紙、雜誌、電視做訪問，多得佢唔少，佢執笠真係搞到我哋好忙，好難忘！」

91年亞姐冠軍羅霖同89年亞姐袁潔儀因為選美改變一生，袁潔儀話﹕「難忘事一定係選亞姐既時候，好聽咪叫清純，唔好聽咪叫傻妹，嗰陣乜嘢都唔識，直到選完美入咗電視圈，真係改變晒人生，仲令到我搵到乜嘢叫袁潔儀。」咁又覺唔覺得有黑幕？佢話：「後尾feel都有，但係唔好講選美，搵工都好，又唔排除有熟人喺度係咪機會大啲，呢個係正常。所以倒不如話係人哋好彩，識到呢個範圍既人，識到人哋梗係幫你喇，識唔到咪用自己能力去幫自己，呢個係人之常情。」

而歐錦棠亦都大爆當年不忿事﹕「封小平入主後，有年台慶搞咗個豬肉獎，但當年《廣東十虎》好好口碑，都唔畀入圍，我最後call爆機都唔出席，搵咗老婆幫我拎。依家個獎都冇我名o架，後來話挑番畀我，我真係挑都唔要，冇仲值得紀念。」

劉錫賢亦都話：「28年當然有好多難忘事，不過我哋曾經喺林伯時代拍過一套包青天劇集，嗰陣我哋一啲二線演員都有份參與，本來我只係得5集戲左右，但係最後拍咗兩個幾月，因為我哋小強(甄志強)貪玩，跳彈床失手整傷手，結果搞到大家要停廠，到佢好番又到女主角出外景又整親，結果拍下又停下，要2個幾月先拍得晒，最後播嗰陣仲同無綫鬧雙胞胎，不過我哋好僥倖搶咗個台灣既正版返嚟播。」