王灝兒（JW）同許廷鏗及周志文等今日穿著婚紗禮服，擔任尖沙嘴一個婚禮體驗活動嘉賓，JW着上一套性感喱士婚紗，肩膀、腰間同大髀都係喱士，佢透露原本婚紗款式係再少布，只係佢要求加番少少布，問到係咪留番自己大日子先性感？JW話：「又唔會，因為好多長輩在場，怕唔好意思。」身旁許廷鏗就覺得件婚紗令JW無平時咁跳脫，所以應該喺正日著得方便紥紥跳。

講到幻想的婚禮，JW指以前有諗，o依家已經無諗同去留意，但身邊唔少朋友都話喺外地結婚比香港平，而許廷鏗眼見身邊朋友都為籌備婚禮忙到一頭煙，因此希望一切從簡，佢話：「搞結婚應該比搞紅館攰，或者可以諗吓喺紅館開騷時求婚，不過有伴先講啦。」