在新片《大丈夫2》裏，有一幕講述毛舜筠率領姊妹團到鴨店尋歡，只因「女人唔滾、男人唔緊」。女人為了令家庭和睦而去滾，似乎是歪理，毛毛也表示教女人去滾只是噱頭，其實是希望大家反省夫婦間關係：男人鍾意去滾，女人啞忍妥協，不會有好結果。

感情無出路

拍這場戲前，毛毛本打算到訪真正的鴨店，大開眼界之餘希望對所演角色了解更多，不過最終也未能成行。毛毛表示現實中有一些愛到鴨店尋歡的女性朋友，她說：「我聽講廣州有好多鴨店，啲男仔又斯文又靚仔，但收費好貴，幾百蚊15分鐘，嘩！咁貴，拍戲就會去。」
毛毛表示曾了解過女性朋友去鴨店的心態後，她感歎道：「其實係好無奈，通常佢哋係有小朋友，又唔想離婚，老公又忽略自己，感情冇出路，所以去滾，用錢去畀男仔𠱁自己開心、得到滿足感，其實呢種心態好悲哀，朋友話去鴨店好開心，我覺得係講大話，點會係享受？」
毛毛與區丁平結婚多年，感情不變，毛毛認為必須不斷自我提醒，她說：「我會成日諗，當日拍拖時為乜鍾意佢，呢種心態唔可以冇，而且仲要係雙方面，唔可以係單方面，就算結咗婚咁多年都要成日諗番以前戀慕佢嗰種心情，當然自己都唔可以變到好核突，如果唔係個老公都會好冇癮啦！」
採訪：魯萍
攝影：陳志嵐
服裝提供：LaneCrawford@Boss