洪欣同內地男星張丹峰忙於頻撲為BB取香港出世紙，好快升呢做老竇嘅劉愷威，亦忙於安頓好內地女星太太楊冪，喺香港乖乖安胎，等住喺香港生B。

劉愷威今日喺喺灣仔會展出席影視博覽活動，提及已經懷孕六個月嘅老婆楊冪，劉愷威話雙親正在照顧喺香港安胎嘅老婆，至於BB性別，劉愷威坦言：「我哋都仲想保持神秘感，所以都冇問醫生呢樣嘢，只要BB健康就已經好足夠。」

不過愷威都好老實話想有小公主先喎，仲話每次檢查時聽到BB心跳都真係好開心。劉愷威預計會陪老婆留港分娩，仲想親自為BB剪臍帶，至於BB改乜嘢名，就交由爺爺劉丹負責。

楊冪來港安胎，之前已有傳媒報道，話佢變得又溫柔又鍾意撒嬌，仲一日四餐，狂擦Pizza同烤鴨。老爺劉丹都話：「以前新抱只食菜，幾乎食全齋，現在常常要食pizza，令人搲頭，因為唔係佢本身嘅口味。」仲話楊冪已經好習慣喺香港待產，仲成日留喺屋企，丹爺都盡量唔想佢出街。其實早於前年，楊冪已與劉愷威聯名以三千萬買入半山梅道蔚皇居作投資，現時市價有升冇跌。