黃榕同許嘉浩（Karl）傍晚現身佐敦一間餐廳拍攝飲食直播節目，早前成功考取健身教練牌嘅黃榕，面對眼前嘅海鮮火鍋同大閘蟹就表示：「唔會刻意節食，見到鍾意都會食好多，因為健身要吸收好多蛋白質。」佢透露嚟緊4月同6月分別會參加兩個健美比賽：「過埋聖誕同生日就要開始準備，到時就真係要節食同健身。」

12月31號生日嘅黃榕透露今年因為單身，所以到時會喺工作中度過，旁邊嘅Karl就寸佢：「佢有拖拍嘅時候都唔會搵朋友㗎啦，之前幾年啲聖誕、生日全部都唔見人。」黃榕又承認今年生日願望之一係快啲搵番個男朋友，仲話首選係肌肉男：「咁我做健身，都希望另一半係鍾意運動健身，有肌肉梗係最好啦！」

精選娛聞，喺晒《娛果》
http://fb.com/appledailyent