【韓流】未婚妻着露背婚紗騷身段 35歲李東鎮下月娶擊劍美女運動員
結婚李東鎮金智妍
曾演出《聽見你的聲音》、《Remember-兒子的戰爭》等韓劇嘅35歲男星李東鎮,與29歲擊劍美女運動員金智妍拍拖近3年,今日宣佈好消息,兩人將於下月29號拉埋天窗。
據悉李東鎮早於今年6月已向金智妍求婚,當時金智妍更喺Instagram晒幸福,獲大批粉絲及好友祝賀。李東鎮及金智妍上月完成婚紗相拍攝,只見金智妍換上多套禮服,由於一直運動而Keep到好身材嘅金智妍亦大晒美好身段,包括露背裝、低胸裝,似乎唔怕未來老公會呻醋。
而李東鎮受訪時表示與未婚妻係經朋友介紹認識,又大讚金智妍好善解人意、好可愛,言語間都好幸福,李東鎮又指:「目前未有即將結婚嘅實感,但估計到結婚當日應該係我喊得勁過老婆。」相當搞笑。至於金智妍就大讚未來老公夠幽默:「喺我覺得辛苦時,佢會喺身邊為我打氣,成為我依靠嘅對象。」