為官逾40年臨尾香
Cheap曾貪婪聲譽一鋪清袋

蘋果日報 2012/06/30 00:00


【本報訊】一個象徵紳士的煲呔,令曾蔭權成為市民最熟識的政務官之一。這名「飲香港水、流香港血」的「香港仔」,始料不及會在05年6月,意外登上特首寶座,登上仕途頂峯。在任財政司司長期間,擊退金融大鱷;接任特首後,卻無法掃走權慾心魔,因為「貪」字而受市民唾棄。權力使人腐化,七年特首生涯,賠上近40年的清廉政務官聲譽。 記者:許偉賢
葉劉批:親權貴,遠市民
empty
卸任在即的曾蔭權,近月面對連串涉貪風波,只能低頭認錯。
「親權貴,遠市民。」是新民黨主席葉劉淑儀,總結曾蔭權在任七年的六字真言。權力使人腐化、也使人怠懶,葉太稱曾蔭權做特首後,不改貪便宜本性之餘,作風更趨浮誇,與富豪同遊為樂,hea做特首,「呢七年搞成咁,煲呔要負好大責任。」
要數曾蔭權任內最大問題,地產霸權坐大是大害。葉太稱,「地產霸權係佢搞出嚟嘅,六年冇賣地,淨係靠勾地,呢樣嘢令土地供應緊張,政府又控制唔到內地人買(香港)樓;佢亦漠視貧窮問題,一講到堅尼系數就係禁區,幫唔到弱勢社群,搞到富者越富、貧者越貧。」
「公務員邊個敢窒佢?」
葉劉認為,特區弄到如斯田地,與曾蔭權剛愎自用有關,「佢唔肯聽意見,連居屋都唔肯復建」,批評曾上任後「好懶」,「連落區都唔肯落,周末只係掛住同富豪暢遊,連彭定康嘅食蛋撻騷都唔肯做。」曾蔭權07年競選連任時以一句「我會做好呢份工」為口號,葉太不諱言「當時已經露晒底」,「反映佢只係將特首當係打份工」,欠缺治港遠景。
葉太與曾蔭權在官場共事多年,透露曾蔭權貪小便宜個性人所共知,「佢做咗特首之後,更加無制衡」,「身為佢下屬嘅公務員,個個都好聽話,邊個敢窒佢?」相信此舉令曾蔭權越來越「貪」,最終毀了公務員清譽。她更篤爆曾蔭權當特首後為人浮誇,「鍾意出風頭、扮元首,但你只係特區之首」,她舉例指,聞說曾蔭權05年接任特首後,即命令香港駐華盛頓經貿辦人員為他約見時任美國總統布殊,「嗰邊啲職員都有口難言,Whoareyou?你只係一個特首」。
empty
葉劉淑儀批評曾蔭權接任特首後「好懶」,一味「親權貴、遠市民」。 黃建通攝
陳太哀:摧毀優良架構
為官40多年的曾蔭權「臨尾香」,看着曾蔭權仕途步步高升的前政務司司長陳方安生坦言可惜;但她認為,曾蔭權任內最大問題,是政務主任出身的他,未有致力捍衞政務主任架構,任由問責制侵蝕政務官的優良傳統。
「我好費解,點解一個政務主任出身嘅人,會一手摧毀政務主任架構?」向來反對高官問責制的陳方安生,指前特首董建華02年引入有關制度,令政務主任不能像過往享有理想晉升機會,政務官與政治任命官員未能好好磨合,是政令不通主因之一。
偏偏由政務官爬至特首寶座的曾蔭權,卻沒有糾正這個制度,反而在08年進一步擴大問責制、增設副局長,令政務官要服侍的上司更多。陳太稱,政務官的優良傳統是明辨事非,「我哋一入去就學,要自己去分析;你可以唔同意我,但要提出充份理據,唔係話叫你聽話,你話行東就行東、你話行西就得西,事非黑白不分」,「但呢啲嘢,今時今日好似變得唔重要,(問責制下)似乎最重視係咪自己人、係咪聽話。」
empty
權力令人腐化,陳方安生對曾蔭權「臨尾香」大感可惜。 黃建通攝
「權,係非常之腐朽」
曾蔭權卸任前不斷被揭奢華外訪兼與富豪過從甚密,陳太不願評論,只說可惜,「佢做咗40幾年,都希望大家最後留畀市民嘅印象,係一個稱職、得到尊重同支持嘅行政長官;(但)人有權嘅時候……,權,係非常之腐朽。」
雖然曾蔭權任內貧富懸殊加劇,陳太卻為他說公道話,稱不能全怪曾蔭權,又指不可以因其貪小便宜事件而認定他在任七年一事無成,指曾蔭權也有功勞,例如任內經歷兩次金融風暴,成功保持本港經濟發展,同時立法設定最低工資。

七一為乜上街?請到蘋果日報facebookfanpage投票吧:
http://www.facebook.com/questions/10151071597587448/