【鋪路離婚?】山口智子嫁唐澤壽明23年 再惹婚變揣測
木村拓哉唐澤壽明山口智子
山口智子同木村再續前緣,但就被指同唐澤壽明婚姻再現危機。
現年53歲嘅日本女星山口智子,1996年靠夥拍木村拓哉嘅經典劇《悠長假期》登上事業高峯,最近佢為木村主演嘅朝日重頭劇《BG~身邊警護人》客串演出,更飾演木村前妻,係兩人相隔22年合體再續前緣。
山口智子為《BG~身邊警護人》擔任串星兩集均成功刺激收視,劇中仲有木村同山口智子嘅Sweet爆場面,第七集更有15.8收視。山口智子幾年前復出拍劇《Going My Home》卻收視仆直,令佢回歸幕前一度失去信心,不過近年見佢再次活躍螢光幕,有傳媒指山口智子再次積極作幕前演出,好有可能係為離婚鋪路,令其23年婚姻再惹外界關注。
山口智子同唐澤壽明結婚多年,一直有傳二人只係扮恩愛,年前有傳媒拍下佢哋兩公婆到意大利餐廳撐枱腳,為山口智子甜蜜慶祝生日,山口智子近年亦曾在公開活動上自言與老公仲好甜蜜,以行動推翻婚變指控。山口智子出身自破碎家庭,佢曾接受雜誌《FRaU》訪問回應不育傳聞,山口自言唔生小孩係佢自己決定,佢因為細細個經歷父母離婚,令佢留下陰影,所以完全唔相信血脈相連呢樣嘢。
精選娛聞,喺晒《娛果》
http://fb.com/appledailyent