港台民主勁熱大互動，唔知點解，呢一排無論係台獨、連宋、宣傳香港人抗爭，都時興手牽手，自從特區文革掀起之後，香港民意反彈第一擊。保護維港大行動，喺「十點前特首」兼電波強勢領袖鄭大班率領之下，係咁意吹吓雞，咁又吸引到二萬人，企滿半個海港，今年六四同七一，唔知會點？
講到保護維港，呢個政府，重有中方，又係值得譴責，喺一九九五年左右，本地親中報章率先發難，攻擊前殖民地彭定康政府，話「港英」臨走，靠害六百萬人，將個深水港逐啲填滿，破壞香港天然優勢！
當日左報對前殖民地政府說三道四嘅攻擊，白紙黑字，現時重存放圖書館，當日嘅親中勢力，話前殖民地撤出之前大搞陰謀，自己當日進駐香港，就係貪華南有一個唯一嘅深水港，𠵱家就快執包袱，就想將個維港填滿，搞到維港撞船風險大增，重唔係想破壞香港風水，兼搞到十三億人民冇運行？
點知言猶在耳，肥彭撤出，留番一個繁榮嘅大都會，特區成立七年來不但做正敗家仔，親中佬及中方當日大罵前殖民地政府填維港，今日嘅特首，自己重變本加厲，填海填得重更瘋狂！