民協元老、前立法會議員馮檢基早前就宣佈退出有份創立嘅民協，另組壓力團體繼續議政。沉寂一排，阿基今日向傳媒發出採訪通知，話希望就「近來嘅政治形勢舉行傳媒茶聚」，至於詳情係咩就未有交代。面對九西補選逼近，阿基喺依個時間突然舉行茶聚難免令人懷疑同參選有關，八方問過阿基，到底聽日係唔係宣佈參選？阿基同八方講「個人跟大家茶聚」，但無透露同選舉有無關。

傳咗退黨好耐嘅馮檢基今年七月正式退出民協，聲稱會另組壓力團體，但暫未公佈詳情，好多人都關注佢未來會唔會以新組織的名義再參選，阿基多次面對記者時都未有正面回應，只係話自己未考慮選舉問題。事隔兩個月，阿基又再次蒲頭，究竟會唔會宣佈參選？各界引頸以待，阿基只係簡單回覆：「我個人跟大家茶聚」，又大賣關子話聽日見面傾，今日講晒聽日咪唔使見囉？

不過，八方都係勸大家對於聽日有咩公佈唔好有太大期望，事關阿基之前兩次話搞茶聚都「撻Q」，聲稱「因故」取消，聽日茶聚搞唔搞得成，都真係要到時先知喇！