86歲劉兆銘(Ming Sir)年前因為太太去世，令佢傷心咗好一段時間，闊別螢幕5年，去年才復出拍劇。Ming Sir最近再接演懸疑警匪網劇《蝕日風暴》，除有港、台兩大男神張智霖同王陽明擔正外，還與秦沛、羅家英、許紹雄、盧惠光、林嘉華、麥長青、陳啟泰、艾威、張松枝等好戲之人合作。劇中Ming Sir演大反派，確實令人期待。

同樣有一段時間冇拍劇嘅陳啟泰，在劇中飾演國際刑警，佢話原本係推咗呢部劇﹕「入行廿幾年，以往多數做主持、或者飾演專業人士，就連扮殭屍都要著住西裝，所以劇組初時邀請我扮警察，我係推咗嘅，因為我想做啲好玩啲嘅角色，最好係變態佬或者殺人犯！後來佢哋提議我演出另一角色，啱晒喇，正正係我想做嘅嘢。」佢仲透露年輕時經常與張智霖一齊玩，但合作還是第一次，所以好珍惜呢個機會。

而「綠葉王」艾威就再度飾演監獄中黑幫大佬，艾威坦言角色有別一般囚犯，在演譯上較具層次，佢話﹕「上次參演Tommy（梁家樹）嘅劇集都係飾演黑社會大佬，不過今次喺創作上有啲分別，我將佢設計成比較斯文、有啲文化背景，所以我要求喺監獄裡面要有本書跟身，係一個不斷求進、識得自我增值嘅角色。」

造型方面，艾威亦下了不少苦功：「喺監獄入面服裝都係一致，唯有喺髮型上花啲心思。事先做咗功課，知道裡面容許犯人將個頭梳得整整齊齊，於是我就以一個整齊嘅髮型同大家見面。」艾威更透露，劇中一場監獄暴動戲相當有睇頭：「打鬥場口令人難忘，今次我都有參與呢個大型場面，不過因為係大佬，所以就指揮居多。」而《蝕》將在9月22日在香港「黃Viu煲劇平台」獨家首播。

精選娛聞，喺晒《娛果》
http://fb.com/appledailyent