「謝霆鋒開演唱會」，已經由大家嘅「希望」，變成「都市傳說」，再慢慢，變成一個「伏」。一個呃錢嘅伏。唔係謝生呃人錢，而係有不法商人借佢開演唱會呢個名呃錢。

謝生係話會開，但講明一定要outdoor，咁至夠free。但講咗兩年(或以上)，都係未開得成。去年最新updated係話:「希望明年(2016年)啦!」

近年霆鋒喺內地拍攝節目《12道鋒味》，邀請咗好多紅星上去做嘉賓，呢個節目喺內地收視都唔錯，於是就食住個勢推出「鋒」廚具、「鋒」熊公仔、「鋒」味曲奇等，食正條水，近日網上就傳出佢藉《12道鋒味》喺內地開演唱會，仲有一個女fans企喺佈景版前面影咗張相，雖然上面嘅細字睇唔清楚，而大字就寫住「謝霆鋒」、「巡迴演唱會深圳站」，佈景版上面仲有個疑似謝霆鋒嘅人。

因為內地經常有騙徒散播假消息，話某某歌手開騷，叫歌迷入錢買靚位飛，一啲心急嘅fans好易誤中圈套被呃錢。於是有謝霆鋒嘅歌迷今日就喺微博貼文澄清：「謝霆鋒沒開演唱會，暫時也沒有準備開演唱會打算，請深圳的同門以及各位朋友不要相信，山寨都開始頂着謝霆鋒的名字打着十二道鋒味的旗號開全國巡迴演唱會了！」

個歌迷仲叫英皇娛樂同經理人霍汶希向fans交代吓，以免騙徒呃fans，亦有網民留言話照片入面佈景版，唔係謝霆鋒本人。一呼百應，網民狂tag霍汶希個名，要求英皇回應。

唔係化，大陸已經強到用「A貨霆鋒」去呃錢？

晚上英皇發出澄清聲明，話霆鋒同呢個深圳冇關，仲話會保留法律追究權利。