【「性別唔緊要」】傳卓林同紋身女教師拍拖 吳綺莉:反而介意佢話畀我聽有咗
吳綺莉韓君婷卓林
吳綺莉(Elaine)今日喺銅鑼灣出席NuMe美容活動,平時甚少扮靚靚,Elaine為咗振奮囡囡卓林,所以決定參加面部提升療程,佢話:「咁大個女第二次留咁長頭髮,平時好少扮靚,我要證明媽媽係努力,早幾個月吃不消,冇嘢比屋企人有事更加大壓力同難過,o依家要振作加油,自己振作先可以幫到小朋友,我有反省,開始令自己好樣、健康。」
提到囡囡嘅情況,Elaine話:「一路有醫生、社工幫手,係我自己唔好,忽略咗佢嘅感受,單親家庭,我哋比較特殊,有啲嘢我頂得順,唔代表佢頂得順,我虧欠咗佢,爆咗煲,感恩好多人幫手,教識我更堅強。」講到囡囡自殘(新聞連結: http://bit.ly/2s40fPI ),Elaine就話:「佢o依家有食藥,媽媽見到小朋友受傷唔會特別開心,佢身體唔舒服,唔可以怪佢,之前調校得唔夠好,好有問題,感恩及早發現,唔係冇辦法補救。」
而問到卓林同網紅A小姐嘅關係(新聞連結: http://bit.ly/2ryMANn ),係咪兩母女嗌交嘅導火線?Elaine就話:「冰封三呎非一日之寒,好多嘢唔可以全部怪人,好多時忽略個女嘅感受,我有同佢講對唔住,所以我要做好自己。」Elaine話會積極工作,仲話已經戒酒,o依家一滴酒都冇飲。
再追問Elaine卓林係咪同A小姐拍拖?Elaine話:「係朋友,17歲,摸索緊,唔知自己係點,17歲拍拖都未必係嗰個,冇得迫。」問佢介唔介意囡囡同性戀?佢話:「我好開通嘅,冇乜所謂,反而介意佢返嚟話畀我聽有咗,我唔想做婆婆,做咁多年人,性別唔重要,搵個伴要照顧、了解大家,心地善良,鍚我個女比任何嘢更重要。」
之前為卓林勞碌奔波嘅吳綺莉,今日明顯悉心打扮出席美容公司活動。
不過自言好耐冇敷Mask嘅佢,由於太潤關係,結果面上生咗粒大瘡。
傳卓林同紋身外籍教師拍拖,吳綺莉話卓林仲細,仲係摸索階段。(網上圖片)