瑞典時裝品牌H&M空降亞洲，以香港為第一站，噚晚8點仲喺皇后大道中新店舉行慶祝派對，7點半已經有超過300名獲邀請嘅VIP打蛇餅排隊。H&M其中嘅MbyMadonna（麥當娜）系列由娜姐設計，所以吸引城中唔少名人明星專程嚟掃貨。噚晚出席嘉賓有徐濠縈、胡敏珊、劉心悠、上山詩鈉同谷祖琳等，鄭裕玲（嘟嘟）同前男友甘國亮前後腳出現。

徐濠縈全家獲贊助

嘟嘟獲安排着上娜姐設計嘅服飾同手袋，但佢只逗留15分鐘就離開，空手而回。問嘟嘟點解唔掃貨，佢話：「冇帶錢嚟，遲兩日先嚟，今日太多人。」
徐濠縈就着上年H&M同Viktor&Rolfcrossover嘅服飾，佢話H&M贊助全家服飾，問係咪有贊助先出席活動時，佢話：「都係㗎！除非自己好鍾意個設計師啦。最近有人贊助埋我個女啲衫，好開心，唔使成日俾人講話我買衫。」新店明天正式營業，第二間分店10月喺九龍站再下一城。
另外，附近嘅大電視播出H&M宣傳片，原來娜姐幫香港首間旗艦店拍咗段宣傳短片，內容講述娜姐為一名亞裔少女改善衣着打扮，更幫佢選咗一系列H&M服裝，令呢位鄰家少女搖身一變成為fashionicon。