【本報訊】佔領近兩個月，曾以貨車堵路的小全哥情緒「爆煲」，決定暫時離開旺角，他說清場或可清走路障，但心中怨憤仍在。87枚催淚彈，令這位粗豪的司機流淚並心痛至今，「我心恨一樣嘢，嗰日唔喺金鐘，如果我喺金鐘唔知幾開心，如果嗰日我喺金鐘我食煙霧彈，不過𠵱家我啲仔女食晒」。

不滿政府拒問責

他佔領初衷是反對用暴力對付手無寸鐵香港人，更不捨得子女代自己食催淚彈。當晚他駕貨車堵塞旺角，逼政府為發射催淚彈道歉，近兩個月仍無結果。他不忿，「政府成日要我哋佔領人士負責，但點解你唔負責？」
小全哥批評政府拒絕為事件問責，「你係咪要香港人做暴徒，香港政府先會妥協？但香港人唔想犯法，唔想推冧你哋。如果你要做到咁樣，一定好激」。
兼顧佔領和工作近兩個月，他坦言心力交瘁，學聯訴求難以達成，自己連一個道歉也得不到。他一邊飲酒一邊抽煙，訴說這56日見證市民努力支援，但佔領者卻未給予支持運動的市民一個答案，「市民係1,000蚊1,000蚊刮荷包買嘢」。他指要思考未來怎走，若警方清場，他仍會返回佔領區。