最近一位小男生Keaton Jones被學校同學欺凌，其母親於Twitter上載出其哭訴片段，片中佢講到：「佢哋嘲笑我個鼻，又話我好醜，話我冇朋友。佢哋將牛奶倒喺我身上，將火腿放入我件衫入面，仲用麵包丟向我。」呢條片引起網民重大迴響，而明星們都留意到，包括「變形俠醫」麥克雷法路（Mark Ruffalo）同「美國隊長」基斯伊雲斯（Chris Evans），佢哋仲留言鼓勵Keaton。

麥克雷法路寫道：「小兄弟，當我仲係小朋友嘅時候，我也曾遭受過欺凌。你係啱嘅，#事情終究會改善！你係我個人嘅超級英雄。好好守護你嘅心，Hulk撐你。」此外「美國隊長」基斯伊雲斯仲邀請小Keaton去《復仇者3》首映：「要堅強下呀Keaton。唔好俾佢哋令你變得心灰意冷，我保證事情會改善嘅。當學校嗰啲惡霸正為自己將來想成為點樣嘅人做出抉擇嘅時候，你同你媽媽願唔願意嚟參加《復仇者聯盟3：無限之戰》明年於洛杉磯舉行嘅首映會呢？」Keaton姐姐即刻開心答應，此舉更令網民大讚兩位英雄於現實中同樣有正義感，而《美國隊長》漫畫作者Mark Waid亦大讚基斯伊雲斯，指自己深受感動。

更多娛聞，喺晒《娛果》
http://fb.com/appledailyent