超級英雄電影長拍長有,就算唔係套套有口碑,但票房都一定有保證,連最近飽受劣評嘅《蝙蝠俠對超人:正義曙光》,全球票房都超過8億美金(約64億港元),難怪DC趕住咁拍「正義聯盟」角色電影,試圖趕上Marvel「復仇者聯盟」步伐。呢類電影望落好受歡迎,但隨住班superheroes湧住咁上映,觀眾又分唔分到邊個打邊個?
記者揀咗幾位知名度比較大,以及嚟緊會喺大銀幕出現嘅Marvel/DC人物畀途人辨認,有啲反應都幾出人意表,其中一位就認錯死侍係勁揪俠 ,另一位睇開超級英雄電影嘅許同學就話:「有啲角色比較相似,咩Quicksilver同Flash ,依家會睇咗預告,鍾意先入場。」