安察洛堤被拜仁慕尼黑怒炒後，即有傳佢可能回巢AC米蘭，搶走「飛機仔」蒙迪拿嘅飯碗。不過，蒙迪拿被問到呢件事時冇有怕，仲講笑話安帥可以做佢助手。

A米今季有中資財團入股後，好想重振雄風，但蒙迪拿嘅帶隊表現似乎就未達標，所以傳出話班股東想搵肥安回巢。喺周四歐霸盃擊敗列積卡後，雖然球會總監米拿比利已否決話安帥會返歸，但蒙迪拿就咁講：「我一向都對佢（肥安）好尊敬，啱啱開始接觸教練工作，就好想學佢啲練習方法，而佢亦當我係細佬咁畀意見。」

呢位A米教頭之後仲講笑：「如果佢真係想過嚟，可以做我助手，又或者調返轉，我做佢助手咯！」睇嚟蒙迪拿同肥安關係真係幾好，斷估除非A米高層將蒙迪拿炒魷，否則肥安亦唔會為份工乘人之危，踢走自己「兄弟」。