傘運期間多名市民稱遭警方濫捕及毆打，但3年以來，鮮有個案狀告政府。無懼破產也要討回公道的，有梁偉文，他是至今唯一公開獲得賠償的個案。傘運後雖有濫暴警員判囚，梁亦獲賠18.9萬元，但警方從未道歉。梁偉文今年3月再入稟高院，為自己及其他受害者討回警方一句「對不起」。

梁偉文並非沒有放棄過，傘運期間他途經旺角，被警方無故拘捕，致手腕骨折及雙眼微絲血管破裂。他一早認定法官只信警察，過堂時已問律師若認罪會如何判刑。其後他始悉有市民拍攝到當時片段，亦有證人主動到警署錄口供還他清白。他最後獲撤控，並向警方索償。結果雙方庭外和解，他獲賠18.9萬元。

去年8月他就警方惡意檢控到警察投訴科錄口供，今年6月獲覆案件已調查完畢，始後再無消息。今年3月他入稟高院，控告警隊一哥濫用職權，「身邊好多人叫我算啦，收咗錢算啦」，索償期間亦受盡冷言冷語，他卻回對方：「咁你依家瞓係地下，攞隻眼比我插，個18.9萬就係你㗎啦。」

他說正因有證有據才被撤控，「仲有幾多呢啲冤案喺度，我自己都不敢想像」。他指現任警隊一哥在上任時曾道，若警隊做錯便會承認，但至今仍拒致歉，批評對方「講大話」，「佢哋認錯就算㗎啦，我想佢畀番一個公道我咋嘛」。

3年申索期將至，他呼籲有證據的受害者站出來追討公道，讓警方無法再肆無忌憚行事，亦避免事件重演，「留喺香港，一係做隻豬，一係做隻狗吠吓你（政府），咁我吠吓你好過喇」。

梁偉文等被警方濫暴個案，背後有賴一眾人權律師奔走。陳惠源是朱經緯案受害人鄭仲恒及now工程人員李小龍代表律師之一，他接受《蘋果》查詢時表示，他接觸的傘運遭濫捕及毆打個案達「雙位數」，但即使不收分文律師費，只有極少數願意站出來。因一旦敗訴，或需賠償對方律師費，「6位數字都未必解決到」。

追討似無力，陳惠源沒有氣餒，「唔可以習慣，唔可以講『係咁㗎啦』」。他眼看不少人逃避心中是非對錯，將底線一再降低，「『相比梁偉文，呢個算打得輕手啦』，係咪可以咁呢？咁先係最可悲」。他寄語大家，「守住自己條線，如果條線一路拉落嚟，咁同藍絲有咩分別呢？」

記者 伍雅謙