呢位叫Katy Pang嘅Madam喺Ig出長文，控訴班同事一直講佢是非兼查佢私生活，搞到佢質問：「咁你地（哋）唔係做緊班曱甴對我哋做嘅嘢咩？」又大爆有好多女同事因為怕咗呢啲是非而辭職，但佢就唔會怕，字裏行間仲爆有同事喺社交媒體中傷佢喺公司（即係警署？）同人性交等，內容非常露骨，亦因為咁令佢心理同聲譽受創，「唔好同我講係警隊文化，要我去適應，你地（哋）公然咁樣性騷擾女同事，叫其他街外人/市民點樣相信你地（哋）？害群之馬，你哋係要自己行為付出代價。」佢仲同時貼出《性別歧視條例》，似要作出最後警告。
八方最支持依法辦事，所以百分百認為Madam應該追究，實行先喺警隊內部止（性）暴制（淫）亂，但同時不免聯想到，過去半年有大量被捕人士控訴Popo性暴力，包括強姦同雞姦，Madam今次爆料，似乎佐證嗰班下體指揮腦袋嘅Popo只係努力咁做返自己，如果佢哋對住同事都唔收斂，咁對住佢哋當係敵人嘅示威者唔通仲會客氣咩？
今次由警隊中人爆警隊黑幕，Madam如果冇講大話，即係警隊真係藏污納垢？話分兩頭，其實政圈都有流傳Madam嘅緋聞，八方一聽就覺得係好大粒花生，但喺追究警暴為首要任務之時，呢啲兒女私情絕對要放埋一邊唔想關注。
李八方