當年今日
關於我們

任總狼來了 - 左丁山

蘋果日報 2003/10/08 00:00


昨日講饒餘慶教授篇鴻文,佢主張聯繫滙率制理應檢討(即係脫鈎),但佢位威水弟子並冇回應,反而喺佢最新專欄中高呼狼來了,話「懷疑」國際炒家累積咗二千億港元沽空盤,何來二千億呢?任總話香港每個月賺取十五億美元外滙,一年一百八十億美元,過去一年,金管局沽售八十億美元資產,換取港元以支付港府財赤。兩者合計二百六十億美元,約值二千億港元。左丁山比較愚笨,呢兩百二十六億美元如果全數沽出嘅話,邊個接手呀?國際炒家?抑或本港市民?睇吓銀行存款三萬三千幾億港元,外幣存款佔咗一萬五千億港元,就知道(一)香港人賺嘅外滙,未必轉番做港元;(二)香港人雖然唔係國際炒家,但亦識得沽港元買美元,以對沖港元脫鈎之後貶值嘅風險,任總話國際炒家沽空咗二千億港元,要攞多啲數據出嚟至得,唔好亂咁「懷疑」。
九七金融風暴嘅大鱷做法係沽期指,沽港元,聲東擊西,任總出手干預(狂加港元利息),於是股市大跌,炒家贏到笑,其後樓市當然亦跌到四腳朝天,股民喊到一句句。今鋪又點呢,熱錢大量流入買股票,買港元,推高港元滙率,任總點干預法呀?搞到港元負利率呀?咁樣就正中國際炒家下懷,贏期指贏到笑。跟風嘅股民亦開心到飛起,如果金管出手干預推冧個市,任總睇怕要學楊永強,甚至梁錦松噃。港元跌,任總驚,港元升,任總又驚,最好就日日就鈎住七個八唔升唔跌,任總唔使驚。如果係咁,百萬美元年薪就太過易賺咯。