張文慈(Pinky)入行超過廿年，做咗亞視一姐多年，亞視人形象深入民心，近年加盟無綫，先後拍過幾套劇，最近終於喺熱播劇《宮心計2深宮計》得到發揮機會，更獲網民讚演得好。

除咗胡定欣、劉心悠、陳煒一班主角之外，一班年過四十嘅中女張文慈、羅霖、康華、張慧儀等做「尚宮房四司」，表現都好亮眼，好似係聽晚播出第23集，大陸網民睇完（早過大台播）都勁讚Pinky。

喺聽晚播嘅第23集劇情講到，Pinky喺劉心悠嘅幫助下，成功出宮還鄉，嗰陣佢一心諗住同初戀情人結婚，兼且又可以同阿哥阿嫂享天倫樂，點知喺佢準備好嘅時候，阿哥阿嫂突然入宮搵佢，佢哋話已經變賣晒所有嘢，諗住去另外一個地方生活。

呢個時候，Pinky先知道，原來自己咁多年一直死慳死抵為屋企，只係俾家人當係搖錢樹，心痛之極，點知阿哥阿嫂仲叫佢喺宮中努力搵錢，繼續養佢哋，最後Pinky爆喊咁鬧佢哋，仲決定同阿哥阿嫂斷絕關係。

現實中，Pinky都係一個非常顧家嘅好女仔，今日有周刊報道，指Pinky擁有油麻地駿發花園居屋同何文田區豪宅兩個單位，市值逾二千萬，平日又揸靚車出入，係隱形富婆。

實情係咪咁呢？Pinky今日回覆傳媒話：「嗰間居屋係好多年前我同細佬一齊住，因為得兩間房，佢結婚後有咗小朋友，唔夠住，我就將自己層樓向銀行再加按，其實都唔係好夠錢，買樓係畀細佬住，當係幫補細佬，有個地方住。」

Pinky續謂：「間居屋係細單位，我唔係咩富婆，我o依家捱得好辛苦就真，要供樓、養阿爸，細佬就唔使我養，我孭到周身債，架Benz揸咗接近十年，係舊車。」

講到話大陸網民激讚，Pinky好開心咁話：「我睇呢場劇本時都好鍾意，其實唔只嗰場戲，成集戲我都好鍾意，有內心戲，又要同屋企人嘈交，我覺得係一個好故仔，好機會。因為劇本對白比較多，三日內要拍晒三日戲，逼埋一齊，對白七頁紙，我一個人solo鬧阿哥阿嫂。做之前都驚自己唔可以一氣呵成，好彩出嚟效果好，好開心。」

相關文章：
【無奈拍《強姦3》】有頭髮邊個想做癩痢？張文慈：唔係為親人，我死咗九次！
https://bit.ly/2I1EaX4

精選娛聞，喺晒《娛果》
http://fb.com/appledailyent