噚晚(周六)係徐小鳳個唱尾場，之前一晚小鳳姐唱《順流‧逆流》送予席上兩位特首——前特首董建華及現任特首梁振英，全場噓聲不絕，令小鳳姐亦頗為尷尬。噚晚尾場上，小鳳姐表示梁振英夫婦聽《順流‧逆流》時，深受感動:「佢哋都眼泛淚光，夫婦都好感動，爭啲仲喊仲咗出嚟。」小鳳姐又謂翌日(即噚日)更親致電特首辦致歉，並問對方自己係咪喺台上講錯嘢，對方回覆話冇。尾場小鳳姐又於台上呼籲全場:「為佢哋加油好唔好？」似是撐梁振英，全場亦未有好似噚晚咁「萬人噓」，而且都fans拍手和應。

之後小鳳姐又笑謂因為當晚曾笑指表演嘉賓盧海鵬嘅「徐大鳳」look似長毛梁國雄，故需向特首致歉。噚晚慶功宴上，小鳳姐笑道:「我特登講笑嘅，不過後來諗下，會唔會得罪特首，唔係幾好意思，後來佢話冇嘢，興眾同樂之嘛。」

提到剛才小鳳姐台上一番勉勵梁振英之語，難免令人覺得佢撐梁，小鳳姐即表明:「我係撐佢0架，我承認係撐佢0架，不過唔關事，佢個位好難做，我明佢做咗好多嘢，而又冇人認同，個心好難過。」

提到周五一場小鳳姐一介紹梁振英及董建華出場，即全場報以噓聲，但當時小鳳姐仍表示當晚聽到嘅係掌聲。慶功宴上，小鳳姐再度澄清:「當晚觀眾嘅係拍手、係歡呼聲，唔係噓聲，我做證明，真係為特首歡呼，一唱『不相信未作犧牲，竟先可擁有』，佢就好感動，兩位特首先生，特別係佢哋太太，湊咗佢哋咁耐，好辛苦，我係完全feel到佢哋感覺，有時做得啱唔啱，係另一回事，但佢哋真係付出咗。」