擁33C咪咪嘅索模梁晶晶（Bonnie），曾全裸被葛民輝潑墨大玩藝術感出寫真（新聞連結： http://bit.ly/2rBz9kJ ），最近更為陳冠希（Edison）嘅老死日本潮人石川涼（Ryo Ishikawa）做model，喺酒店拍私影終極大膽露股相，石川涼係日本街頭潮牌「FXXKING RABBITS」嘅主腦，連Edison都着過佢嘅品牌tee幫手宣傳。幾年前石川涼以FR2之名做網絡攝影師，喺社交網分享以女性pat pat為題材嘅寫真，連AV女優蒼井空都係佢嘅model，仲喺日本開過個人攝影展。

今次Bonnie獲石川涼邀請影晒相，全裸上陣更獲石川涼勁讚！問到Bonnie點解會影呢輯相？知唔知石川涼同Edison好friend？Bonnie接受《蘋果》電話訪問表示：「初初未識佢真人，都知道佢好勁好出名，日本教父藤原浩都有同佢合作，識落傾偈嘅時候，可能佢知我係香港人，問我識唔識Edison？佢話同Edison好friend，其實佢同好多潮流人士都好friend。」

問到點解會影呢輯相？Bonnie坦言：「佢話喺香港有啲嘢要做，問我可唔可以同佢影輯相？呢啲咁榮幸機會梗係影啦。其實同佢合作，本身睇過佢啲相，都知道性感程度去到邊，因為佢同好多出名artists合作過，仲幫過蒼井空影相，見到尺度都係咁，自己其實冇乜嘢，因為本身尺度都好大，冇乜嘢底線，之前同葛民輝合作，都係全裸露點冇問題，可能香港仲係好保守，自己有睇外國展覽，見到啲相尺度真係嘩一聲，唔通呢啲作品擺喺會展，會展又變咗色情場所咩，唔係咁樣嘛，所以尺度完全冇話介意。」

作風大膽嘅Bonnie仲話影嗰刻完全唔尷尬：「如果遮遮掩掩，我影落唔知點，佢又唔知點，不如casual啲，佢想點影就點影，好開心佢滿意呢輯相，擺喺佢唔同嘅社交網絡，我見到呢啲相都好開心。」