9歲「香港小巨肺」譚芷昀（Celine）早前喺美國節目《全美一叮》（America's Got Talent）憑住Celine Dion嘅名曲《My Heart Will Go On》一鳴驚人。

最近有一隊年紀與Celine相約嘅小女團A Little Bit Shy（ALBS）小羞羞女團成軍，7位成員分別8至10歲，小女孩們異口同聲都話好欣賞Celine嘅勇氣同埋膽色，仲封佢做偶像。其中一位成員Yumi（柔美）曾經跟過Celine爸爸譚順生學唱歌，唱歌技巧又真係唔錯，仲即場清唱咗首《Flashlight》，Yumi原來仲認識Celine，佢話：「我真係識Celine，我以前跟佢爹哋上唱歌堂，4年之前，學咗一年，喺家燕姐姐度認識，之後私人跟佢學，佢教得好好，我可以慢慢學識唱歌，之後因為太忙，冇時間參加唱歌堂。」Celine一直以來接受爸爸嚴格訓練，Yumi有冇試過嚴格訓練？佢話：「你想唱咩，佢就教你點樣唱。」

今年9歲嘅Olee話成日上YouTube睇Celine唱歌片：「我係YouTube聽過佢唱歌，佢唱得好好聽，我無佢咁大膽，喺一個外國節目入面唱歌，不過，我跳舞就夠膽，我都好想好似佢咁去比賽。」

8歲嘅Lexy就話想同Celine做朋友：「我好鍾意睇電視，我好鍾意睇Celine Dion，我好鍾意做體操，因為會令到我好開心，我鍾意Celine Tam，佢同我一齊唱歌，就會好好朋友囉！」

香港精英隊運動員蜜棗棗（Starry，真名麥早霖），今年都係9歲，佢話：「我好鍾意體操，一個禮拜做15個鐘，藝術體操令我學會永不放棄。」年紀小小，練到一身肌肉，仲可以隻腳放係頭上面，佢對自己周身肌肉好滿意：「我無特別care我嘅shape，我媽咪覺得我健康就得喇！」Starry玩體操獲獎無數，記者稱讚佢時好有禮貌咁回應：「好多謝，你咁讚我，我都覺得好光榮，用咁多時間好值得。」

講到Celine Tam，佢就話：「佢咁淡定，咁勁，有咁多人睇住佢，我覺得佢唱得好勁，我喺度諗，如果我唱歌有佢咁好，我就會加埋我嘅體操，it is the highest of my dream。」

ALBS(A Little Bit Shy)小羞羞女團成員：
Yumi 柔美 10歲
Olee 9 歲
Luna 小玥 9 歲
Cher 雪兒 9 歲
Mo 旼 9 歲
Lexy 8 歲
Starry 蜜棗棗 9歲