今晚電影《寒流黑金》喺銅鑼灣舉行記招兼首映，韓星李秉憲晚上8點半左右到場，佢一身西裝骨骨gel晒頭勁型佬，chok晒樣咁俾傳媒影相。

司儀台上問咗關於電影嘅問題，講到對於今次角色演譯上有冇難度，佢就透過翻譯話:「今次係拍得好開心嘅，個角色係屬於搞笑，加上劇情入面，講到我係電影中段冇咗右手，後來成套係要用左手去做，都幾大挑戰。」

講到電影於韓國非常賣座，對香港票房有冇期望，李秉憲就話:「其實有少少文化差異，觀眾對角色未必夠了解，不過都希望香港有好成績。」到傳媒問答環節，有記者問佢早前出席奧斯卡頒獎禮嘅感受，佢話:「收到呢個通知好突然，感受好興奮，因為去奧斯卡係一個夢想嚟嘅，夢寐以求，可以有機會同咁多優秀嘅演員同導演同場，好似發夢咁。」

之後，有記者想問有關奧斯卡被指歧視亞裔人一事，不過可能翻譯出錯變成講早前歧視黑人件事，李秉憲先回答:「其實美國有好多人種，應該都會容納到好多人種喺入面，當日我喺紅地毯都答過。」再有記者更正係指台灣導演李安發信比奧斯卡投訴一事，奧斯卡亦已道歉，佢反問翻譯邊一個係李安，翻譯告之係台灣導演佢就知道，然後回答:「自己係未有聽過呢個新聞。」

問到完成呢套戲之後，下一個工作係咩?李秉憲話:「之後返韓國仲有2部韓國電影要拍。」對角色有冇期待?佢話:「每次劇本都唔同，好似白紙咁去摸索角色。」