港股踏入12月後成交大幅萎縮,大概說明了以機構投資者作主導的港股,臨近年尾都以放假心態應市,事實上不少基金的表現早已塵埃落定,越接近年尾反而更加不敢作重大改動,以免衰收尾保唔住花紅。近日一單配股消息,是以上心態的其中一個證明,波司登(3998)日前遭第三大股東奧林匹克投資配售減持合共2.01億股舊股,套現約7億元。
奧林匹克投資為波司登上市前投資者之一,以波司登今年升幅之巨,相信已有巨利。不過升得多唔代表明年無得升,最重要是對前景睇法,波司登中期業績增逾80%,超出市場預期,按彭博綜合預測,集團2011及2012年預測PE分別僅16倍及13倍,平過唔少內需股,可見以上基金未必真係睇淡,食糊心態可能更重要。
今年只剩半個月,手上有貨未必要急於食糊,反而更重要是明年的投資主題。今年其中一隻明星股是中國建築(3311),因中國政府大量興建廉價房,樓市會否受影響不得而知,但可以肯定今後幾年將有大量搬遷活動,受惠行業包括冷氣機、家具,以及其他家電。