軒仔張敬軒今晚紅館個唱頭場，甫現身就以驚艷「降兩度」形象登場，又做港女招牌手勢，鞠躬時又以手掩Pat pat驚走光（係呀，佢著咗條熱褲仔呀），仲話自己為咗演唱會做咗人生最重要嘅事：「就係剃腳毛，用咗個幾鐘。」

之後「降兩度」連唱《Crazy in love》、泰文版《失戀》、唱印度話《Jai ho》、韓文《No Body》，終於用廣東歌，然後話：「開心時間過得好快，我嘅演唱會已經到尾聲，歡迎大家嚟到紅館睇史上最短演唱會，自己真係好唔捨得個舞台，如果今晚買飛嚟睇我嘅人，睇完呢首歌可以走啦，由黃色大門出去。」

唱完《女神》之後，現場奏起《香港小姐》音樂，有人出場幫軒仔加冕、着斗篷，軒仔拿着權杖向四面觀眾揮手飛吻，但行行吓佢踩到斗篷，kick咗一kick。

軒仔唱完《女神》後，就有表演嘉賓出場，就係胡楓同羅蘭姐！

修哥先由升降台由台下升上嚟，佢話：「監製叫我嚟做表演嘉賓，我即刻應承，點知嚟到唔可以唱歌，淨係嚟講嘢。當我黃子華咩？」眾笑，修哥再說：「自己答應咗先，上到台，自己鍾意唱歌又得，跳舞又得。」之後修哥就唱咗幾句《愛是永恆》。

輪到羅蘭姐上台，即同修哥講：「我一直喺下面等緊你呀。」修哥即回曲羅蘭姐一句：「啋！我同你有排都未去下面啦。」羅蘭即刻更正：「我係講喺下面嘅升降台等埋胡楓升上台。」之後，羅蘭講返點同軒仔相識，提及軒仔喺意大利買咗個十字架畀佢。