34歲嘅梁政珏，同生意人老公何思源（John）嘅愛情結晶品預產期喺11月初，第一胎自是特別緊張，而且又有胎盤前置、胎盤過低同子宮後屈問題，陀B以來先後兩次出血，壓力不小，醫生更叮囑其要住醫院直到生B。

不過日前梁政珏於網上貼上文，指護士嘅香味令其嘔吐大作，又指其態度有問題。梁政珏及後表示，應不止一個孕婦有類似遭遇，只是沒有人反映，而梁政珏覺得此問題需要正視，故已向主診醫生同醫院反映。(新聞連結: http://bit.ly/1gWUR88 )

噚日梁政珏終於可以出外，欣賞藍天白雲，仲特登貼片上ig寫道:「今日我竟然有得散心，成個月以來第一次外出，雖然都係醫院去醫院，但已經好好好開心喇，仲食咗碗雲吞麵㖭，總算平安度過..」頭先梁政珏又share同老公攬攬相，寫住「中秋節快樂toeverybody」，其中一張見梁政珏輕撫肚子，一臉滿足。

梁政珏接受《蘋果》訪問時表示，佢依家已經好乖咁聽足醫生吩咐，至於點解仲周圍去遊車河食雲吞麵，梁政珏就解釋:「因為我呢個情況，常見係會見紅，佢要流出嚟就會流出嚟，就算你倒吊個人，佢要流出嚟都係會流，但如果你瞓喺度唔郁，佢就會凝固，咁樣係好危險。」

不少人都擔心梁政珏咁樣行來行去，會增加風險，而且坊間都係話如果孕婦有出血情況，就不宜落床，梁政珏話當初就係聽信家中長輩之言，點知俾醫生鬧:「老人家同坊間流傳都係話，如果見紅，就最好臥床，千祈唔好郁，唔好企起身，連洗手間都唔好去咁樣。我都試過臥床，就係因為聽老人家講嘅，醫生聽到之後就嗌我千祈唔好呀，有生命危險。sofar我問過8個senior專業醫生，個個都話我呢個case一定企同行，如果唔係就好危險。但因為我哋都唔知邊一次見紅係生嗰次，所以為咗母子平安，就要喺醫院住，喺有需要嘅時候得應該要嘅照顧。」

至於身體狀況，梁政珏話:「都係咁啦，有時反覆啲有時就好穩定，一讚佢一兩句，跟住佢就會好小器……我個仔係最小器嘅。」