日前宣佈「入伍」、50歲型男「馬神」馬德鐘，噚日同太太張筱蘭結婚25周年，佢哋育有20歲獨子馬在驤，早前去咗澳洲升學，今次銀婚佢哋兩公婆就可以過二人世界囉！

馬太噚晚facebook放閃，兩公婆慶祝銀婚，佢留言：「由12歲開始認識你@馬德钟JM ，到今天與你結婚步入4份1世紀，感恩一直同行。人生就是要將今天活得比昨天好。銀婚快樂！」馬太仲貼出佢哋那些年拍拖照片，馬神同太太puppy love認識至今，認真唔簡單，睇番佢哋少男少女時已係一對金童玉女，馬太想當年曾做model，及至誕下囝囝才淡出，全心一意做馬神賢內助。仲有佢哋93年結婚舊相，當年馬神未紅，馬太背後默默支持，陪佢捱過艱辛歲月。

兩夫妻共過患難，特別珍惜，馬神噚晚都轉發馬太嘅留言，兩夫妻齊晒恩愛，佢哋兩公婆仲sweet爆戴上情侶鏈手牽手。

《蘋果》今日叫馬太分享幸福婚姻之道，佢甜絲絲回覆：「問得非常好！可以一陣問問Joe （馬德鐘）！我想聽吓佢講。」馬神大方話：「甚麼是幸福，能令對方幸福自己就必然能感到幸福！甚麼是快樂，能令對方快樂自己就必然能感到快樂！能多替對方着想，能接受平淡簡單的生活，人生就是精彩及美滿了！」

精選娛聞，喺晒《娛果》
http://fb.com/appledailyent