城市脈搏2:
墨西哥Band仔硬撼本地薑
每逢禮拜六日,人迫迫嘅銅鑼灣、旺角同中環都會出現一堆堆圍觀嘅人群,佢哋都不約而同支持那些街頭表演者,而呢類嘅表演者亦愈來愈多,就連「來路」的都有,總之愈旺的地方就有愈多人圍,愈多人圍嘅地方就愈多人表演!
記者:黃藹瑩
攝影:陳智良
好耐無見過中環嘅天星碼頭有咁多人圍埋一齊,大熱天時大人細路個個企定定,重拎住部相機同videocam拍個不停。啊!原來係呢四位「印第安人」有咁大嘅吸引力!
呢四位「印第安人」並唔係真正嘅印第安人,只不過佢哋擁有非一般嘅專業精神,做戲要做足全套,十四年來周遊列國嘅流浪賣藝生涯中,每個成員都會披起印第安服飾,將塊面畫到紅紅綠綠,務求令每一個街頭睇過佢哋表演嘅人都會留下深刻印象,佢哋就係RAZA!
■圍觀嘅人數都唔少㗎,隊Band都未真正開始唱就已經圍滿晒人。
■唯一識講英文嘅主音Lobo話會留喺香港約個半月,下一站會去上海。
來自墨西哥的RAZA成員其實有五個,但今次只有其中嘅四位成員現身香港,佢哋都可算係專業的流浪賣藝者,除咗嗰套極之型爆嘅印第安裝之外,表演時的兩支咪stand、擴音的amplifier都係佢哋嘅私伙嘢,而佢哋喺表演期間不忘向觀眾兜售嘅CD,都係同佢哋一樣由墨西哥空運到港,主音Lobo話:
「我哋所有CD都係自己錄製,CD中有啲歌係自己作,亦有部份係啲folksongs。」
出沒地點:中環天星碼頭、銅鑼灣駱克道
李小姐:「佢哋對音樂嘅誠意令我好感動,而且佢哋嘅音樂係自己原創,所以買一隻當係支持佢哋!」
Joe:「我好鍾意聽呢類型嘅folksongs,加上佢哋好cute,一於要買。」
入黑時分嘅旺角新之城門口有幾個後生仔喺度忙住set咪整結他,慢慢圍觀嘅人群亦愈來愈多……
同樣跟Beyond一樣咁鍾意夾Band嘅四位後生仔,平均年齡都係21至22歲,隊名叫做Gopow,今次可算係佢哋在街頭的處子表演,透過商場嘅邀請可以喺街頭夾band表演。玩base嘅阿傑好似比較怕羞,相機鏡頭一對住佢眼神就立即迴避,另外兩個結他手阿輝同浩倫表演的時候相當落力,而鼓手阿豪就係最突出的一個,最能吸引在場嘅圍觀少女。阿傑透露佢哋四個由中學時代已經開始夾Band,到𠵱家都有7年,之前都未試過喺街頭做show:
「今次係第一次,所以set咪試音都唔係好順利,搞咗好耐先可以正式開始。」
出沒地點:旺角新之城門口
■街頭圍觀的人數確實唔少,可以肯定香港人對街頭表演實在好欣賞。
■在明愛嘅安排下Gopow可順利在商場門口做show,重話日後有可能繼續再戰街頭。
每逢旺角夜晚8至12呢段時間你都必定會聽到佢嘅歌聲,佢就係廣為旺角蒲友所認識嘅Micheal。Micheal在旺角大大話話都唱咗三年,「有咩未見過!」。
「三年前我啱啱出嚟旺角唱都唔知有幾多人圍住我,聽我唱歌,不過𠵱依家啲人見你日日都喺度,對你嘅興趣都無以前咁大囉!」
出沒地點:旺角行人專用區
■Micheal話逢禮拜五、六、日都會比平日賺多一倍,一日大概有百幾蚊。
Ricky「年輕人嘅活動空間實在太少喇,上街都係一個好嘅途徑。」
阿奇「我好鍾意呢啲街頭嘢,香港有其實都唔錯,不過始終無外國咁流行。」