《一帶一路醫藥行》今日於浸會大學舉行啟播儀式，出席者包括「超藝理想文化學會」嘅榮譽會長陳復生，仲有中華人民共和國外交部駐香港特別行政區特派員公署辦公室主任楊嫻，以及中聯辦協調部處長陳俊峰等等。話明「一帶一路」，班底自然「紅」。

呢個《一帶一路醫藥行》本月17日無綫財經資訊台播出，節目主持除有陳復生，仲有佢24歲女兒麥景榕，不過女兒今日要返學，故未能出席啟播。

陳復生以前話晒都係無綫力捧，女兒亦充滿表演天份，今次做主持，亦係佢首次幕前演出。陳復生話：「因為想透過節目喚起年輕人注意調理身體、同埋中醫保健，咁啱又撞正個女放暑假，所以叫佢參加。佢今日要返學，所以嚟唔到，但都有繼續為拍攝團隊拍外景。呢份係我個女第一份暑期工嚟0架。」

陳復生話，佢喺北京開嘅製作公司，個女都有份參與幕後製作工作，但幕前就真係第一次：「佢未接受過正式幕前訓練，但導演都好滿意。佢主修法律，已畢業，但仲想進修，所以會讀一年文學碩士。」將來會否入行？陳復生笑稱：「真係唔知，佢嚟緊一年都係忙碩士課程，忙讀書，但個女今次會比較了解幕前工作。我覺得年輕人心態可能每樣都想試下。做父母嘅，只要仔女做正面嘅嘢、對社會有貢獻嘅，都應該支持。」