第六場四班1400米又係雷神莫雷拉世界！呢個巴西強人今場夥拍呂健威馬房「鑽飾傳奇」大熱1檔起步，沿途在第三位有遮擋競跑，末段沿欄直上追過外側「勝利專家」，險勝一頭位，單Win及組合獨贏A1分別派32及18元。

雷神呢日跑完前六場，獨攬三冠兩亞一季全上名，三匹頭馬是「鑽之友」、「大步走」及「鑽飾傳奇」，做硬騎師王，兼一洗佢剛周三（13日）晚谷戰罕有地零入Q僅獲兩季的頹風。至於「鑽飾傳奇」廐主呂健威連同頭場由潘頓贏「幸福加數」，這天亦憑兩匹大熱門錄得個人季內首次起孖。

六歲馬「鑽飾傳奇」上仗開鑼日四班1400米用史卓豐後上第四已山雨欲來，今仗同班同程換雷神，發揮果然更佳，馬兒自2015年5月取得連捷後，近兩年以來初次取勝，馬主吳國基是澳門練馬師李家輝外父，此駒亦成為今日次匹1檔頭馬（首駒是第二場「旅英公爵」）。

第六場三T尾關熱門當道，次熱「勝利專家」跑第二；啡燈有飛馬「帝勝之星」後上不及跑第三；第四名是大冷門「放眼量」，四重彩派二萬七千幾，三T正獎有人中，每注派56萬幾。