同班傳媒高層錫錫講再見後，快將落任嘅民主黨主席劉慧卿今日轉為親親小學生，卿姐似乎同傳統名校聖心嘉諾撒嘅學生特別有緣。何解？卿姐話，呢幾日係佢喺立法會嘅尾聲，今日喺立法會大樓「重遇」聖心嘉諾撒小學生，大家梗係合照留念。

91年開始做議員嘅卿姐同班小學生講，92年、即係佢啱啱做咗立法局議員第二年，佢獲邀到呢班學生嘅師姐學校、即係聖心嘉諾撒中學做主禮嘉賓，當時有一位聖心中學生送咗幅油畫畀佢，卿姐由當年起一直掛喺辦公室至今。每次傳媒到佢辦公室做訪問，幅畫通常都係背景板。

卿姐話，26年後見到新一班嘅聖心小六學生，認為呢次嘅會面為佢嘅議會生涯畫上完美句號，佢促請呢班學生大個後考慮從政，為香港人爭取權益。聖心從政有邊個？咁就真係勁咯，有陳方安生、陳淑莊等。咁卿姐係咪畢業於聖心？咁就唔係嘞，佢係瑪利曼出品㗎。