當年今日
關於我們

蘋果批-會計界選舉論壇之二:候選人逐個講「專業」 - 李兆富

蘋果日報 2008/08/19 00:00


噚日睇過會計界喺《蘋果批》選舉論壇上嘅火爆場面。但會計界始終係一個專業,大家都好想知道候選人會點樣運用佢哋嘅專業幫市民,同埋點樣平衡專業同整體社會嘅利益……

主持:李兆富 楊卓華
黃宏泰:
最離譜就係政府公佈完財政預算案,但係睇到唔對路,民間疾苦聲音好犀利喎,又再出嚟派錢,咁唔使財政預算案啦!變咗你冇一個穩定嘅政策,見到唔掂,(團體)出嚟嘈,就派多啲,以前好少見到呢啲嘢出現。另外,香港稅基窄,大家都知道……另外就係燃油稅,政府話:燃油稅唔減得,嗰啲私家車係奢侈品嚟……冇問題,奢侈品,你啲高官咪唔好坐車囉!
龔耀輝:
政府有好多唔同基金喺度,(例如)賣地收益就會分到去基建工程基金度,政府未來仲有幾多工程要做呢?基金有特定嘅用途,但係個用途係咪個個贊成呢?係好大問題。第二就係再培訓基金,呢個基金好多時係俾人詬病,(培訓機構)有開班去申請,但個用途係咪真係去到市民嗰度,就真係成疑。(第三)我覺得要改善就係個presentation(列出資料)嘅手法……財政預算案,我相信唔會有市民睇得明白,佢有好多唔同嘅項目,背後有好多附表。
譚香文:
我哋要睇番《基本法》107條,就係要量入為出,(確保政府)收支平衡。過去幾年,政府有多餘嘅錢就派咗去,派糖,但係唔夠錢嗰陣時就加稅,好似個搖搖咁上上落落……使錢方面,副局長政治助理可以畀三年工作經驗嘅人十幾萬;使咗一百一十幾億話要幫貧苦大眾,但就有「五無人士」冇收到呢個幫助;最近又有個高官退咗休,跟住轉去商界,咁佢做官嘅時候,佢已經係賤賣我哋嘅土地,令到我哋嘅(庫房)收益少咗……所以嚟緊呢年我哋要昅住政府使錢嗰一套方法。
陳茂波:
財政預算案,政府冇利用佢去推動香港嘅經濟轉型,缺乏一個長遠嘅藍圖……第二方面係冇正視到提高香港競爭力,譬如將香港嘅稅制改善,將香港同周邊其他地區嘅雙邊稅務協議多簽一啲,令到香港有個優勢,吸引內地嘅企業嚟香港,用香港做個跳板到外國做生意;吸引佢哋嚟做生意,幫助到香港嘅經濟發展。第三就係喺處理投資收益度,政府仍然係太保守,喺外滙基金嘅分賬,應該可以積極啲。
陳茂波:
我哋喺立法會裏面係代表全香港市民,只不過我哋嘅專業專長,係來自會計界……至於剛才講嘅例子,喺我哋界別裏面,大家都以公眾利益為重,大家唔會為咗一啲好處而放棄業界對民主嘅熱愛、民主嘅訴求,呢一點大家可以放心。

龔耀輝:
會計師都係市民,我睇唔到會計師點解同大眾市民有衝突……頭先你講過嘅例子,我都講過,就係會計界嘅議員唔應該代表業界去內地爭取任何利益。我覺得會計界如果要爭取任何利益,應該由公會去做,唔應該議員去做,原因就係每一次去爭取利益嘅時候,都有交換(利益)情況發生。
龔耀輝:
會計師都係市民,我睇唔到會計師點解同大眾市民有衝突……頭先你講過嘅例子,我都講過,就係會計界嘅議員唔應該代表業界去內地爭取任何利益。我覺得會計界如果要爭取任何利益,應該由公會去做,唔應該議員去做,原因就係每一次去爭取利益嘅時候,都有交換(利益)情況發生。

譚香文:
過去作為一個立法會議員,最緊要就係跟住《基本法》73條去做,就係監察政府施政、財政預算嗰啲咁,其實就係照顧香港整體社會嘅利益……我就同中聯辦冇關係,我知道有啲候選人同中聯辦嘅關係十分之好,我唔會受中聯辦影響,因為業界嘅利益而忘記咗香港社會嘅整體利益,呢個係立法會議員應盡嘅責任。

黃宏泰:
你講嗰個例子,話中聯辦派人嚟。中聯辦喺香港過千人,你都要睇吓佢乜嘢grade(級數)至得㗎!如果派個普通文員嚟同你傾,你同佢傾都多餘啦!咁睇吓佢級數啦,如果佢級數高,可信程度高,咁先諗諗。另外你話個協議,都要睇個協議內容,中港協議,唔係(未必)話香港着數晒。好似會計師互認咁,大家互相承認會計師,你香港可以上去搵食,人哋內地可能都可以落嚟搵食,到時可能你未搵到佢生意,佢已經搶晒你生意。