Adam一直熱愛踩單車，曾經走去台灣環島遊，今次除咗參加50公里賽，仲會同好友一齊參加半專業級嘅隊際計時賽，過往有消防員同警察組隊參賽，都係一場惡鬥。
至於畀人感覺較書生文靜嘅Christopher，佢落場踩30公里賽，聽聞都有做足練習。聞說佢過去3年都有玩新地垂直跑，應該有啲運動底嘅。
同日「總裁慈善及名人單車遊」項目，都有唔少總裁（CEO）參與，但唔少都係來自新地子公司，例如有「九巴金公主」之稱嘅伍穎梅、一田CEO黃思麗、新意網（8008）CEO任景信。其他出名嘅仲有包浩斯（483）創辦人黃銳林、東亞銀行（023）副董事總經理唐漢成等，可惜新地主席郭炳聯要出門嚟唔到，由執董董子豪上陣。