銀娛（027）主席呂志和一向和善，呢位老人家最近竟然被對手金沙中國（1928）主席Sheldon Adelson激親，事關Adelson上星期開名話銀娛「犯咗巨大錯誤」，正所謂佛都有火，呂志和噚晚主動回應話「出口傷人並非一個有地位人士所為」。
Adelson向來言論惹火，2006年曾以一句「如果嫌廚房太熱，就咪煮菜」，寸過賭王何鴻燊怕競爭。上星期金沙公佈半年業績，比市場估計為好，股價即刻彈起。年逾70歲嘅Adelson，不單止未收火，仲牙擦擦咁乘機踩下對手，講到澳門新開嘅賭場，佢竟然點名話「銀娛已犯咗巨大錯誤」，佢冇講明對手犯咗乜嘢錯，費事對手停止犯錯咁話。
此言一出，濠江即刻有陣火藥味，呂志和噚晚主動透過公關回應，一開頭就話唔會評論其他人嘅意見，指公司都係專心做生意，推動澳門做世界旅遊中心。
講完一輪客套說話，話鋒一轉，即刻話「然而，對同業趾高氣揚、出口傷人並非一個有地位人士所為，做人能心存厚道乃一種福氣」。擺到明係唔多高興，咁又係喎，銀娛旗下澳門銀河二期今年5月底先開幕，Adelson指對手犯錯，的確好唔客氣。