前年跟韓流始祖裴勇俊嘅32歲女星朴秀珍，目前正懷有第2胎，即將榮升幸福一家四口之際，朴秀珍近日就捲入是非。朴秀珍早前被爆去年10月誕下大仔時疑利用知名度獲特權，插隊令早產嘅大仔可以盡快用到氧氣箱，又送冬甩給護士，讓經理人及父母都可以去探BB，同時朴秀珍又被指大仔一直霸佔病危嬰兒嘅床位。

事後朴秀珍就否認有獲優待，亦有向該網民道歉，而與事件相關嘅三星首爾醫院亦有為朴秀珍澄清表示佢冇享特權，但網民依然唔賣帳。有網民就今次事件，上月30號喺「青瓦台國民請願留言版」上留言發起請願，要求調查「朴秀珍獲三星首爾醫院優待」一事，該網民留言寫道：「藝人就可以獲優特？明明有更加病危嘅BB，但只需餵母乳嘅BB就霸佔病危嬰兒床位兩個月，叫其他病危嬰兒點算？就算係藝人嘅小朋友，點都要公平處理吧？呢個就係韓國嘅積弊，在此要求三星首爾醫院及朴秀珍出面就事件道歉及作出改善。」

截至韓國時間今早6點，呢篇留言請願已經有逾5萬1千名網民同意，比前日錄得嘅47,600人，明顯急劇嘅上升人數表示事件令唔少人關注。除咗呢篇留言，「青瓦台國民請願留言版」上仲有多達近100篇留言係同朴秀珍享有特權一事有關。

相關新聞連結
【韓流】利用知名度醫院享特權？朴秀珍認有請醫護人員食冬甩
http://bit.ly/2BstWMa

【韓流】醫院澄清朴秀珍冇享特權 爆料者不滿：院方多次拒絕探B要求
http://bit.ly/2zTBcVg

更多韓流，喺晒《娛果》
http://fb.com/appledailyent