由孔劉、金高恩、李棟旭等人主演嘅新劇《鬼怪》將於下周五首播，眾演員除咗聽日會現身劇集發佈會之外，劇組今日就公開咗5張新海報谷劇。

5人海報中，金高恩同劉仁娜分別將手放喺孔劉、李棟旭嘅膊頭上，已經暗示呢兩對有感情線，而男團BTOB成員陸星材就一支公望遠方，好鬼孤獨。而喺另一張只有3位男星嘅海報中，李棟旭揮手倒瀉食物，好嬲咁望住孔劉，孔劉就一臉驚嚇嘅表情，預視咗兩人同居期間嘅情況，相當爆笑。

另外，金高恩輕輕將頭挨喺孔劉背後顯得好溫馨，而劉仁娜着上低胸開叉長裙，擺出性感嘅甫士攬住李棟旭，好不誘人。