繼前排嘅賣身葬父行乞二人組後，𠵱家又有黛玉吐血，總之你諗得出嘅古裝悲情橋段，呢班叔伯兄弟都可以做畀你睇，只怕你睇完唔畀錢！
話說呢場大龍鳳，前日喺深水埗港鐵站A2出口上演，讀者麥生收工後諗住行鴨記，點知就見有位白衫阿姐喺港鐵站出口外，趴咗喺堆紙皮上面，不停磕頭，麥生行埋去八吓，見到阿姐竟然嘔血，係堅嘔㗎，「見到成口血噴出嚟！」由於演出太精采，麥生睇咗分幾鐘先醒起要拍片。
就咁睇，阿姐七情上面，好痛苦咁㗎，佢面前塊紙皮，就有一攤紅色嘅液體，成嘴都紅晒，真係我見猶憐，咁精采嘅表演，都吸引咗一啲市民嘅注意，但係大部份都係一臉疑惑，亦冇人走去問佢有冇事，或者幫手call白車，可能係懷疑阿姐係咪進行緊行為藝術啩！但亦都有市民俾阿姐嘅內心戲感動，畀咗錢佢，有位女士仲畀咗100蚊！

阿Sir動容：使唔使call白車？

正所謂，一個出色嘅演員，「演技應該係由外到內，再由內去返外」，阿姐嘅神級演繹，搞到連阿Sir都擔心佢，走埋去問佢有冇事，使唔使call白車，但阿姐吐血吐到忘我狀態，完全當班阿Sir冇到，望都冇望，繼續出力吐，但呢個時候，血好似吐晒，變到好似痰上頸咁，但阿姐嘅表情依然keep到！阿Sir走咗之後，港鐵職員終於出現，叫阿姐行過啲唔好阻住出口，但阿姐當然睬佢都儍啦！
雖然阿姐冇擺出募捐嘅字句，但麥先生認為，呢位阿姐一定係行乞黨成員，「如果真係吐血，就去醫院啦！點會行乞！」