當年今日
關於我們

抵食大牌檔:
石塘嘴街市歎暖身炭爐菜

蘋果日報 2002/01/22 00:00


曾是聞名煙花地的西環石塘嘴,如今依然保留了一點點古風。晚飯時段走進市政大廈的熟食檔,炭爐三寶:煲仔菜、煲仔飯和火鍋,展現眼前,用炭爐煮食唔係要領牌咩?店主解釋:「遲些巿政大廈裝咗冷氣,就唔可以用炭爐啦,暫時都OK。」今晚就趁天氣轉涼,珍惜眼前爐,食餐暖笠笠的炭爐菜。

記者:楊一凡 
攝影:陳智良
田雞滑雞飯$50 街坊推介
要煲出滋味煲仔飯先要購買特製兩溝米,米粒需用水浸半小時,待飯粒開始熟時,才加入配料,攪兩攪後冚蓋,慢火焗至全熟,以及焗出色香味。食店的人氣煲仔飯正是「鴛鴦雞」,好秘笈即時公布。

熟客陳先生試味報告(紅圈者): 田雞的鮮甜味完全滲入飯粒當中,甘脆的飯焦煲得好有技巧,調味可事先聲明:少油或走油配多豉油。
枝竹羊肉腩煲$40-$80 老闆推介
先爆香柱侯醬、南乳和薑等,然後加入新鮮羊肉,炒香,慢火燜三至四小時,出場前加枝竹和葱段滾片刻。一開蓋,肉香四射,每塊都腍身入味。老闆說在天寒地凍之夜,每晚約賣二十斤羊肉即二十幾煲。小煲$40,中煲$60,大煲$80。

試味報告: 黑草羊肉質軟熟,皮薄爽滑,熬至濃稠的肉汁非常入味,連皮吃也不覺油膩,伴白飯的話,連扒三大碗也沒問題。
荔芋臘味煲$45
芋頭軟綿又香口,全因落前先走油。膶腸、臘腸和臘肉一經受熱,脂肪馬上燃燒,同場的荔芋趕緊揩油,索油索個夠,有剩?浮面保溫封味。幾時食都香溫可口。

試味報告: 腍到起沙的芋頭渾身充滿臘味香,湯底油潤香口。
水魚鍋$120全隻(以時價計算)
開設在街巿的熟食檔近水樓台,新鮮材料日日入貨,冬日特設水魚火鍋,同樣配藥材湯底,水魚又叫鱉,滋陰補益,背甲是食療精要。

試味報告: 水魚肉質細膩,肥腴鮮美,水魚湯較雞湯更清甜。有興趣一試的話,請先電話預訂。
醉雞鍋$100全隻$60半隻
無論你幫襯全隻或半隻都送埋藥材湯底,清甜的湯底是用圓肉、淮山、杞子、北芪和黨參熬數小時,由於製作需時,想食記得預訂。鮮雞用花雕酒浸透,伴薑絲和芹菜粒。

試味報告: 甘甘哋的藥材湯,加入花雕鮮雞肉後鮮甜倍增,清甜的雞湯略帶醉意。
直擊煲飯過程
店名:合記
地址:西環石塘嘴巿政大樓熟食中心2字樓C13
電話:25460720
座位:約30個
營業時間:朝6晚11
付款方法:只收現金