踏入6月初，馬會牌照委員會會議自不然成為焦點，究竟然下季騎師陣容會係點，而除韋達之外，仲會唔會有新倉口，同樣係大家關心議題。

據了解，目前所有公司騎師，包括貝力斯、夏禮賢同杜美爾三個較新面孔，都入紙申請，希望下季可以留低。

至於華將陣容下季變動頗大，賴維銘已掛靴，吳嘉晉估計亦會結束策騎生涯，長唞的黎海榮暫未有消息，見習騎師黃俊因晨操意外需要養傷一段時間，未知幾時先能復出。

近季屢受傷患困擾嘅蘇狄雄，曾傳過今季之後會掛靴，轉做幕後，不過佢最終都有入紙，希望至少騎多一季，然後先再算。

今季初蘇狄雄嘅視力出現問題，因而缺陣過兩個月，直接影響到成績，季內暫只贏到四場頭馬，幸好最近座騎數目增加，有得上陣就有機會爭功，好似今晚（5日）谷戰頭場三班2200米隻「旅遊首席」，前仗就喺佢胯下爆115倍大冷贏馬。

蘇狄雄話自己都睇得好開，好似出戰第四場四班1200米嘅賀賢戰馬「轉數高」，因潘頓揀騎試閘表現甚佳嘅羅富全馬房初出馬「精神威」，蘇狄雄唔介意執二攤策「轉數高」。

狄狄仔5月10日曾策「轉數高」試谷草1200米閘，然後5月下旬先交畀潘頓出賽跑第五，今次潘頓唔騎，賀賢考慮到狄狄仔曾幫手操馬，決定搵佢操刀。

「轉數高」今場抽12檔，但隻馬過往留前鬥後，直路常交到一段衝刺，今次留得順利嘅話，唔好話贏，跑入前列拎番啲獎金真係唔奇。

---------------------------
【六四30】守住歷史 拒絕遺忘
https://hk.adai.ly/zdzKtt2RiW