33歲前港姐葉翠翠情路波折,08年暗撻內地富商黃有龍後忽然富貴,坐擁兩棟共值3千萬豪宅,加上投資有道,被封為「港姐股神」,仲傳佢有半億身家。最近翠翠搵到中產男友新歡,對方乃年約40歲嘅建築師公司副董事周曉東(Raymond),更傳好事近。平時明明有拖拍都唔認嘅翠翠,罕有地承認戀情。咦,唔通……
今日露背葉翠翠同低胸顏子菲到大埔超級城出席活動,已有一排冇見傳媒嘅翠翠都忍唔住同大家講句「好耐冇見」,原來佢啱啱喺上海拍完劇返港。咁同男友咪好少時間見面?翠翠甜笑:「都係。」
翠翠又話:「拍咗拖幾月個月,但用咗好長時間了解。」係咪要等穩定才公開?佢又甜笑:「OK啦,但都係了解中,冇報道咁誇張。我每次拍拖都係認真想有將來,同每個男友拍拖,都係想同佢結婚。」
至於點解選擇公開?翠翠話:「因為俾人影到囉,加埋我依家呢個年紀,都正常。」之後佢再話:「希望大家俾機會我,好好相處,好怕每次同男性朋友出街都有報道打擊我,同朋友食普通飯都大造文章,希望大家俾我呢棵幼苗開花結果。」
咁係咪如報道所講,明年中秋結婚?翠翠表示:「結婚係有講過,但冇講幾時。」
之前報道影到佢哋兩口子家中玩煮飯仔,咁依家翠翠係咪成日上男友屋企煮飯飯俾佢食呢?點知佢話:「佢煮嘢俾我食多啲,佢唔鍾意出街,煮飯成為我哋嘅主要節目。」講番話翠翠依家有半億身家,佢又笑:「我都想。益生菌就有。」男友身家比你弱?翠翠再笑:「等我問下佢有幾多。我搵男友,都想搵個錫我愛我嘅人,唔係計較錢同外表。」
之但係………「淘金」呢個朵,同翠翠好似分唔開咁,一路都跟住佢。翠翠無奈苦笑:「跟一世,做手術都切唔走。以前細個,唔識面對傳媒,有啲新聞唔太好。」又話之前報道中男友list上嘅人,好多都唔係男友,只係普通朋友而已。
再追問翠翠多一次:「幾時結婚?」佢又甜笑:「我都想盡快嫁,同男友已經經過考驗期。」又建議圈中人如果想戀情穩定,就應該公開:「我好多年前唔認自己拍拖,點知真係影響自己同事業。」
講番話無綫董事局人事變動,梁乃鵬退休,殼王陳國強走馬上任,又有節目因為收視低被腰斬,翠翠唔敢回應:「呢啲都係高層的事,我冇資格評論,我都係搞掂自己咋。」講到呢度,翠翠忽然借題發揮喎……
翠翠話:「好似今日又有一難關要過喇。」咩難關?佢就笑喇:「我都唔知聽日報道出嚟會點,驚佢俾同事笑,希望大家高抬貴手,唔好亂寫,我驚嫁唔出呀。」
同場嘅顏子菲對於舊東家亞視冇糧出都好擔心:「所有舊同事都受牽連,我自己較心急,中國人傳統係講要過肥年,希望高層快啲處理。」那會否經濟上幫助舊同事?佢話:「佢哋唔使開聲,有時我都同舊同事食飯,但近日真係比較忙。」原來佢最近接咗套法國動作電影,屬格鬥片,要開始training,見佢兩個拳頭都瘀晒,真係令人心痛。