其實傳媒噚日喺記者會都有問到,隨團官員使唔使隔離?衞生署衞生防護中心傳染病處主任張竹君就話喎,如果隨團人士有機會接觸返港人士,會配備足夠防護裝備,所以返港後毋須接受強制檢疫。到底具體係點裝備法?張竹君就話會有感染控制嘅同事向隨行官員提意見,例如喺機場時應該着乜衫,堅稱做足措施就唔使隔離。
政府早前都派包機去日本接載鑽石公主號郵輪乘客,咁今次包機嘅防疫措施同上次有乜分別?張竹君話唔清楚措施有冇再加強,但強調上次已經做足防疫措施以防交叉感染。換個角度睇,可能唔少港人都支持官員唔使隔離安排,皆因可能仲易過動員市民去癱瘓添馬艦。